Champhaiah ruihhlo hâl ral a ni

Champhai DC mawhphurhna la mektu Mark Lalthanliana chuan nimin khan Champhai District Hospital-a bawlhhlawh hâl ralna hmun (incinerator)-ah heroin hawng 107 (gram 1,366.09) a hâl.

Mark Lalthanliana chuan, ruihhlo hâl chuan ṭhalai, ruihhlo bâwiha táng mekte nun pahnih khat tal a chhan a beisei thu a sawi a, “Mizorama ṭhalai tam tak suattu ruihhlo ṭhahnem tak man a nih theihna tur leh hâl ral a nih theihna tura hma latu police-te hnathawh a fakawm tak zet a ni,” a ti.

Champhai SP Rex Zarzoliana Vanchhawng pawhin thu sawiin, ruihhlo mante chu rei tak kawla chhe thei a nih avang leh court-a ngaihtuah a nih laia tihral a phalsak vanga hâl a nih thu a sawi a; Champhai police-te’n ramri kâna Mizorama ruihhlo lut tur leh tawlhrûk tumte an vèn chhunzawm reng thu a sawi bawk.

Heroin hâl tâkte hi Champhai police-te’n August-November 2019 chhunga an man, Rs. 52,24,000 hû a ni a; a kaihhnawihah thubuai pakua ziah a ni.