Mizoram sorkar-in rel chuan man 15% pawh a tumsak thei lo - BJP

BJP, Mizoram Pra­desh-in central scheme-te Mizorama kalpui dan endik tura an din, Central Schemes Monitoring and Vigilance Cell (CSMVC) chuan thuchhuah siamin, Mizo tangkhangte haw man tumsak thei lo Mizoram sorkar an dem.

Mizoram BJP chuan, state páwna Mizo tangkhangte haw man tur sorkar laipuiin 85% a tumsak tawh chunga state tum ve tur 15% Mizoram sorkarin a tumsak ve thei lo niin an sawi a, “Mizoram sorkarin a tumsak theih loh vanga state dangte hmalakna chu a lawm­awm rualin, kan ram Kristian ram tan thil zahthlak tak a ni,” an ti a; Mizoram sorkar chu mipui thleng phâk ngaihtuahna nei turin an chah a ni.

BJP CSMVC chuan, Mizoram sorkarin NEC aṭanga Covid-19 dona tur emergency fund cheng nuai 300 a dawn chu April 1, 2020-ah sanction a ni a, thla hnih chhunga hman zawh vek tur a ni tih tarlangin, “NEC hian Health department hnenah sum hmanna report utilisation certificate a rawn dil a, nimahsela, sum hman chu sawi loh, pawisa hi Health department-in a la dawng lo a, Finance department-ah a la tangkhang a ni,” an ti.