Niminah mi 5 swab sample endik

Zoram Medical College (ZMC) Covid-19 Testing Laboratory-ah nimin khan Covid-19 veia rinhlelh mi pangate swab sample endik a ni a, test result hriat hman a ni lo.

May 10, Pathianni khan Mumbai aṭanga air ambulance hmanga phurh haw cancer damlo pakhat chu State Referral Hospital (SRH)-ah admit a ni a, damlo chhungte pathum pawh enthlak turin damdawi-inah awmtir an ni. An swab sample pawh nimin khan lâka endik nghal a ni a, he thu ziah lai hian result a la chhuak lo. Heti hian SRH-ah hian Covid-19 vei rinhlelh thilah mi 45 dah luh an ni tawh a, chu’ng zinga 39 chu an chhuak leh tawh a ni. Pathianni tlai dar 5 leh nimin tlai dar 5 inkar khan screening point hrang hrangah state pawn aṭanga Mizorama rawn lut mi 673 enfiah an ni a, quarantine centre-ah mi 13 dah thar niin, Rapid Antibody Test thar mi 60 an awm.

Covid-19 lèn tirh aṭanga nimin tlai dar 5 thleng khan Mizoramah mi 80,535 enfiah an ni tawh a, quarantine centre-a dah mi 2,229, mahni ina inkhung hrang mi 7,208, Rapid Anti Body test mi 2,194, RT-PCR test mi pali, swab sample lak 206 an awm tawh bawk.