MJA leh Gujarat Mizote an inkâwm

NEDP press study tour hmanga Gujarat tlawhtu MJA member-te leh Gujarat-a Mizo awmte chu November 25, Inrinni khan an inkâwm.

Inkawmna hun hi MJA vice president Zo­nunsanga Khiangtein a kaihruai a, zanriah an kilho nghal.

Gujarat-ah hian Mizo zirlai leh hna thawk 200 vel an awm a, kum 2011 aṭangin zirlai pawl dingin, nikum aṭang khan Pathianniah inkhawm (fellowship) an nei ṭan a ni.

Gujarat sorkara GAD secretary C Lalnunmawia ruahmannain Gujarat sorkar official-te an kawm a, anni hian tui lama an state hmalakna an sawifiah nghal a, "Zangna­dawmnaah harsatna kan tâwk ngai lo," an ti.

C Lalnunmawia chuan, khawi hmunah pawh duhkhawp lohna a awm vek thu sawiin, "Gujarat-ah pawh hian induhkhawp lohna a awm ve tho. Mizoramah officer fel tak tak, an hna pawh hria, thawmhnaw bâla hna thawh hreh lo an awm tih ka hria," a ti a; chu'ng officer-te chuan Mizoram hmasawnna turah beiseina a neihtir thu a sawi.

Mizote chu thil intih­hmuh hrât tak an nih thu sawiin C Lalnunmawia chuan, "A ṭha leh a chhe lam pawh kan intihhmuh zung zung a, ṭan kan lak chuan hnam dangte tih theih, tih theih loh kan nei bik lo ang," a ti.

Gujarat-in tui lak kawnga an hmalak dan sawifiahtu Sardar Sarovat Narmada Nigam Ltd. (SSNNP) director Dr B Joshi chuan an state-in lui an neih that loh thu sawiin, "Kan lui lian neih chhun Narmada khuapin, hmun hrang hrangah tuikhuah siam chawpin tui kan pump ṭhin," a ti a; Narmada lui aṭanga km. 300 chuanga tuikhuah siamah tui an pump ṭhin thu a sawi.

Zawhna chhangin Dr B Joshi chuan, tui pump-na kawng leh tui­khuah siamna atan mimal ram lâk ngai ṭhin mahse zangnadawmnaah harsatna an tawh ngai loh thu a sawi a, "Tribunal lamin dan fel tak neiin zangnadawmna an rel fel a, buaina kan nei ngai lo," a ti.

Gujarat sorkar official-te sawi danin, an Tribunal hi Supreme Court judge pension tawh kaihhruaina hnuaiah kalpui ṭhin a ni. An thutluknaa lungawi lo an awm chuan Supreme Court-ah an zualko a ngai a, mahse, thutluknaa lungawi loh vanga Su­preme Court thleng an la awm ngai lo. Khaw sawn chhuah ngai an awm chuan zangnadawmna an pek bakah, chenna in, sikul, damdawi-in leh mamawh dangte an ngaihtuahsak ṭhin.