Garage nei lote hrem dan tur rêl

Coordination Committee on Traffic Management (CCTM) hnuaia Working Group Committee chu nimin khan an chairman Lalbiakzama, Home department additional secretary hoin an ṭhukhawm a, garage nei lote hrem dan tur an sawiho.

Hetih lai hian, CCTM chairman R Lalzirliana, Home minister chuan, amah kawmtu media-te hnenah lirthei neite garage nei vek tura hriattirna chu khauh taka kenkawh a ni dawn tih a sawi.

Meeting-ah hian Traffic Police hotute leh Transport department enforcement lam hotute an tel a; lirthei nei si, garage nei lote enfiah dan tur leh hrem dan tur hrang hrang an sawiho a ni.

Mizoram sorkarin motor neitute garage neih vek tura hun a pek thla 14 chu November 30 hian a tawp dawn a, December 1, 2017 aṭang chuan garage nei lote chu MV Act 179 hmangin Rs. 500 chawitir an ni dawn a, garage an neih hma chuan ni tin Rs. 500 an chawi dawn a ni.

Na zawka inhremna dan siam tum a ni a, chu chu Law & Judicial depart­ment-ah a awm mek a; dan thar a chhuah hunah chuan garage nei loa motor neih chu thil buaithlak tak a nih tur thu meeting-ah hian an sawi.

Meeting-a an rel danin, zan lama kawngpui sira lirthei dahte vai ṭhin a ni dawn a, Traffic Police leh Transport department enforcement team hrang hrang siam niin, an endik ṭhin ang. Kawngpui kama motor dahte chu hnuh sawn a ni dawn a, a hnuh man leh an dahna hmun man chawitir an ni ang. Garrage nei lo vaitu tur team hrang hrangte chu December 1 zanah Vanapa Hall-ah vai liam tum a ni.

TMCC chairman Zira chuan zawhna chhangin, Aizawl khawpui tâwt tihziaawmna atana Aizawla lirthei neite garage nei vek tura hriattirna chu khauh taka kenkawh a ni dawn tih a sawi a, "Kum khat vel kal tawh aṭangin lirthei neite chu garage nei vek tura hriattir an lo ni tawh. Thupek ngai pawimawhin mi tam takin garage an nei tawh a, la nei ve lo pawh eng emaw zat an awm tih hriat a ni a, garage hi mi zawng zawngin anmahni pualin nei vek thei lo mah se, mi in luah mai tura beisei an ni," a ti.

Home Minister chuan, sorkar ruahmanna chu sorkar tan ni loin, mipui tan a nih thu leh chu chu mipuiin hrethiam se a duh thu a sawi a; Aizawl khawpui chu nuam zawka siam turin mipuiin mawh an phur a ni tih hria se a duh thu a sawi bawk.