Health Minister-in ambulance hlan

Infant Mortality Rate (IMR) Incentive Grant sum Rs. 42,25,000 hmanga lei, medium ambulance pahnih (Advance Life Support Ambulance leh Basic Ambulance) chu nimin khan Health minister Lal Thanzara'n CMO Conferene Hall-ah a enkawltu tur Health & Medical Education (HME) department director Dr T Lalhmangaihi hnenah a hlan.

Health Minister chuan, IMR Incentive Grant aṭanga ambulance pahnih lei belh a ni chu lawmawm a tih thu sawiin, HME department-in ṭangkai taka an hman a beisei thu a sawi a; Health department pahnih - Health Services leh HME-te chu pumkhat an nih avangin indaih loh leh mamawhna thilah chuan inpui zel tur an nih thu a sawi bawk.

Ambulance inhlannaah hian Health secretary Lalrinliana Fanai, principal director Dr F Lallianhlira leh Health Services leh HME officer-te an tel.

Ambulance pahnih hi 13th. Finance Commission Grant aṭanga Reduction of Infant Mortality Rate atana Health department-in sum a hmuh hmangin AEON Medical Pvt.Ltd., lndore, Madhya Pradesh aṭanga lei a ni a; a chhunga khawl dah turte pawh company engineer-te'n an vuah fel vek tawh a ni.

Basic ambulance zawk atan hian Rs. 16,35,566.17 sen a ni a, Advanced Life Support Ambulance atan Rs. 25,89,433.83 sên a ni thung. Advance Life Support Ambulance zawk chu ICU anga hman theih tura thuam a ni a, a chhungah ICU mamawh khawl hran hrang dah a ni.