ICC-EXIM Summit buatsaih a ni

Indian Chamber of Commerce (ICC) leh Export Import (EXIM) Bank of India-te chuan, nimin khan Aijal Club-ah ICC-EXIM Summit (Energizing Entrepreneurship for International Trade) an buatsaih a, Commerce & Industries minister H Rohluna'n a hmanpui.

Summit hi sorkar laipuia Ministry of Commerce & Industries hnuai­a Joint Director General of Foreign Trade leh Mizoram sorkara Commerce & Industries department bultuma buatsaih a ni.

Minister H Rohluna chuan, Mizoram chu khawchhak ram nena insumdawn tawnna kalpui turin hmun rem takah a awm tih a sawi a, "Hei hi kan hman ṭangkai thiam chuan ramin hma a sawn phah hle dawn a ni," a ti a; Kaladan Multi Modal Transit Transport Project chu Mizoram bika hna thawh turte zawh thawkhat a ni tawh tih a sawi.

H Rohluna chuan, entrepreneur-te tihhmasawn nan Mizoram sorkarin NEDP hnuaiah hmalakna hrang hrang a kalpui tih sawiin, "Mizoram hian Agriculture leh Horticulture-ah theihna tam tak a nei a, hemi tihmasawn leh kan thar chhuahte thawn chhuak thei tura hma kan lak zel a tul a ni," a ti.

Summit-ah hian ramri kâna insumdawn tawnna - lak luh leh thawn chhuah chungchanga hriat tur pawimawh te, EXIM Bank hnuaia hamṭhatna awmte leh an hnathawh dante inzirtirna a ni.

Sorkar thuchhuah tarlan danin, India hmarchhak state-te chu Asia khawchhak lam ramte nena insumdawn tawnna atan kawtkai pawimawh a nih avang­in entrepreneur-te'n an hman ṭangkaia an hlawkpui theih nan ICC-EXIM summit hi buatsaih a ni. Summit hi kum 2016-ah Agartala, Tripura-ah ṭan niin, hmarchhak state hrang hrangah neih tum a ni a, Aijal Club-a neih hi a vawi thumna a ni.