AYUSH chungchang Minister sawipui

Health minister Lal Thanzara leh Ministry of AYUSH hnuaia Central Council for Research in Homeopathy-a director general Dr. Raj K Manchanda chu, nimin khan Health Minister pisaah an inkawm a; Mizorama AYUSH tihchangtlunna leh hmalakna tihphuisui dan turte an sawi dun.

Minister Lal Thanzara chuan, Health & Family Welfare department-in Mizoram AYUSH a kalpui dan a sawi a; AYUSH ṭhan zelna atan leh mipui mimir­in AYUSH damdawi an hmelhriat zel thei nan Central Council for Research in Homeopathy-in mawhphurna lian tak a neih thu a sawi.

Lal Thanzara chuan, mipuiin AYUSH enkawlna an ngaihsak zawk theih nan Council hmalakna leh rua­hmannain a ṭha lamin thui tak nghawng a neih theih thu a sawi a; Mizorama AYUSH hmalakna leh hnathawh tihchak nan mithiam chher chhuah kawngah leh infrastructure dinna kawnga theihtawp chhuahpui turin Dr Manchanda a sáwm.

Dr Raj K Manchanda chuan, Aizawl Civil Hospital-a AYUSH zir bingna, Clinical Research Unit chu Regional Research Institute-a hlankai a nih thei nan Council-in hma lak a tum thu a sawi a; Unit kaltlangin AYUSH doctor-te tan Continuing Medical Education (CME) programme ṭan vat a nih tur thu Health Minister a hrilh.

Dr Raj Manchanda chuan, Clinical Unit pawimawhna sawiin, thisen sang inṭan tur te, zunthlum inṭan tirh dan zirbingnate kalpui chhoh tum a nih thu a sawi bawk.

Ramhmul damdawi (medicinal plant) chungchanga Minister zawhna changin Dr Manchanda chuan, ramhmul damdawi chîn (cultivate) chu eizawnna tling a nih thu te, state danga tlangram hmunah pawh hlawhtling taka kalpui mek a nih thu a sawi a, "Mizorama ramhmul damdawi chîn chu Medicinal Plants Board hnuaia chak taka kalpui a ṭul a ni," a ti.