Hri danna pek chungchang sawiho

Aizawl East & West Distict Task Force on Immunization chu nimin khan DC pisa conference hall-ah an ṭhukhawm a; hri danna leh hrilêng vaina (disense surveillance) chungchanga hmalaknate leh hmasawnna tura kal zel dan tur an rêl.

Meeting hi Aizawl DC mawhphurhna la mektu additional DC John LT Sanga'n a kaihruai a; hri danna (immunization) chung­chang bakah, sorkar laipui hmalakna bawhzuina Measles Rubella Campaign neih dan tur sawiho a ni. Measles Rubella Campaign hi January 2018-ah Mizoramah kalpui ṭan tur a ni a, lo inruahman lâwkna tur thilte sawiho a ni.

Measles Rubella Campaign hian naupang thla 9 aṭanga kum 15 la pumhlûm lo zawng a huam a; measles (sentût) leh rubella (nau piansual leh nau chhiat thlentu) hri danna chu sikulah leh veng/khaw chhungah chawlhkar thum chhunga pek tum a ni. Campaign hi a hlawhtlinna turin target zinga 95% tal pek tur a ni.