Forest department hmalakna sawiho

Environment, Forests and Climate Change (EFCC) minister TJ Lalnuntluanga hoin nimin khan Principal Chief Conservator of Forests (PCCF) conference hall-ah video conference hmangin meeting neih a ni a; Mizorama forest division 25-a divisional forest officer (DFO)-te leh officer pawimawh dangte an tel.

TJ Lalnuntluanga chuan, "Ram pumah khauh taka inkhuahkhirhna kalpui a nih chhungin EFCC department-a thawktu eng emaw zat chu hripui léng karah chàwl thei loin, ramin a mamawh avangin an pên chhuak a ni," a ti a; thawktute inpekna leh ṭhahnemngaihnaah lawmthu a sawi.

Meeting-ah hian agenda pasarih sawiho a ni. Green India Mission (GIM) kalpui dan, inkharkhip laia forest kaihhnawih dan bawhchhiatna ven hna leh dan lek kawh a nih dan, Green Mizoram hnuaia thing kung lian chi kûi ṭiah chungchanga hmalakna, reversed forest chhunga ram pass cancel, CAMPA hnuaia DFO tinte'n ruahmanna an siamte leh rawhling (bambusa bambos) ṭiak lak khawm chungchanga DFO-te hmalaknate ngaihthlak a ni.

An tarlan danin, Covid-19 vanga inkharkhip hun remchanga hmanga dan loa thing zai, sapêl, ramvak, lui kal leh ram hâl chíng mi eng emaw zat an awm a, chutiang mi an mante chu pawisa chawitir an ni. Thingzai leh dan loa silai kawl leh chelek man eng emaw zat a awm bawk.