KHAWTHLIR

Vawiin chhun dar 12 hian chief secretary Lalnunmawia Chuaungo hoin ATI Auditorium-ah sorkar hnathawk pawl hrang hrangte'n Covid-19 dona atana an hlawh thawh chung­chang sawiho a ni dawn. Meeting-ah hian Federation of Mizoram Government Employees & Workers leh Mizoram sorkara sorkar hnathawk pawl tin aṭangin mi pa­khat ṭheuh an tel ang.

Nimin khan Aizawl Civil Hospital-ah Territorial Salvation Army Youth huaihawtin SAY-te'n thisen unit 55 an pe a, petute mipa 39 leh hmeichhia 16 an ni. Zonuam Unit ṬKP pawhin unit 13 pein, petute mipa pariat leh hmeichhia panga an ni a; individual donor mipa panga leh hmeichhia pali an awm bawk.

46th Assam Rifles chuan May 10, Pathianni khan New Vaikhaw­tlang khuaah a thlàwna inentirna an buatsaih a, a thlâwnin damdawi mamawh angte an sem nghal. Inentirte hnenah Covid-19 chungchanga hriat tur pawimawhte an hrilh bawk.

Committee for Promotion of Locally Manufactured Protective Gears-in April 24, 2020-a an lo rèl tawh angin, Covid-19 laka invenna hmanrua (protective gear) tualchhung siam chhuah tihhmasawn nan CM Relief Fund aṭangin May 6 khan Rs. 5,00,000 pek chhuah a nih thu sorkar thuchhuahin a tarlang.

October 7, 2019-a rúlin a chuk vanga thi Lalnunsanga (45) nu, Sangveli (86), Tlabung Chawnpui hnenah May 8, 2020 khan sorkar­in zangnadawmna Rs. 2,00,000 a hlàn. Lalnunsanga hi a nu nen chauha khawsa an ni a, tuikhura inbual tura a kal chu rûlin a kutah a chuk a, Tlabung damdawi-in panpui ni mah se, chhan hman a ni lo.