India President a lo zin dawn

India president Ram Nath Kovind chuan ni hnih chámin Aizawl a rawn tlawh dawn a, vawiin hian a lo thleng ang. President lo zin turah hian venhimna khauh taka kalpui a ni dawn a, lirthei tlân dan pawh a ṭul anga tihdanglam a ni dawn.

President hian vawiinah Kolkata aṭangin Mizoram a rawn pan dawn a, Lengpui Airport-ah Governor, Chief Minister leh minister dangte'n an lo hmuak ang. Lengpui Airport aṭangin helicopter-in Ṭhuampui Helipad a pan ang a, Helipad aṭangin motor-in Aizawl Raj Bhavan a pan dawn a ni.

Ram Nath Kovind hian vawiin tlaiah Raj Bhavan Durbar Hall-ah khawpuia cheng, mi retheite tana chenna in sakna, Housing Complex for Economically Weaker Section a hawng dawn a; chumi hnuah Raj Bhavan-ah CM Lal Thanhawla nen an inkawm ang a, a hnuah minister dangte an tel zui ang.

President of India hian naktuk zingah Mission Venga PC Girls School a tlawh dawn a, chawhma dar 10-ah Raj Bhavan-ah tlawmngai pawl hruaitute leh khawtlang hruaitute a kâwm ang a, chawhma dar 11-ah Mizoram Assembly session-ah thu a sawi ang. Assembly-a thu a sawi zawhah Naga­land panin Aizawl a chhuahsan dawn a ni.

President lo zin tur avang hian Traffic SP C Lalthanmawia chuan lirthei chet vel dan leh hûn dan chungchangah hriattirna a chhuah a; chu chu vawiin leh naktukah hman a ni ang.

Traffic Police-te ruahman dan chuan, vawiin hian zing dar 9 aṭanga tlai dar 5 inkarah Ṭhuampui Helipad junction leh Raj Bhavan inkar, Bawngkawn, Chaltlang, Chanmari, Zarkawt, Dawrpui, Treasury Square inkarah lirthei reng reng kawngpui sîrah hûn/dah phal a ni lo.

Naktuk Ninganiah pawh zing dar 6 leh tlai dar 4 inkarah Raj Bhavan leh PC Girls School, Mission Veng inkar ( via Upper Khatla - Sikulpuikawn) kawngpui sirah te, Raj Bhavan - Thuampui Helipad via Treasury Square, Zodin, Zarkawt, Chanmari, Chaltlang, Bawngkawn kawngpui sirahte lirthei dah leh hûn phal a ni lo bawk.

Traffic SP chuan, India ram lal ber lo zin hi danin a phût anga zalen taka a chet vel theihna tura lirthei tlân dan leh hûn dan tihdanglam leh ruahmanna siamte chu hrethiama zâwm turin mipui a ngen a; a kalna tur kawngpuiah hian vawiin chawhnu dar 2:30 hnu leh naktuk chhun dar 12 hnu lamah dan pangngaiin lirthei an tlan theih dawn loh avangin lo inhmakhua lâwk turin mipui a ngen a ni.