Biate-in khaw fai ber an nih an lawm Inel vanga fai ringawt a tâwk lo - Zodintluanga

Biate khua chuan Mizorama khawpui (Census town) fai bera thlan an nih chu nimin khan an khuaa Zialung Hall-ah an lawm a; khuallian, Zodintluanga, UDPA minister chuan, khaw fai inelna a awm dawn vanga fai ringawt a tawk lo tih sawiin, Biate khuain fainaa inelna a awm loh pawha an khua an vawng fai reng chu fakawm a tih thu a sawi.

Zodintluanga chuan, sorkar ṭanpuina tel loa khaw fai ni tura Biate khaw mipuiin hma an lakna chu entawntlak a tih thu sawiin, “Biate-in sorkar ṭanpuina tel loa mipui thawh khawm aṭanga bawlhhlawh in paih char char hi kan ngaisang cheu a, khaw tam tak tan entawntlak in ni. Faina hi mi tin leh khaw tinin keimahni tan vek a nih angin mawh kan phur a ni,” a ti.

UDPA department a enkawl hlima Aizawl khawpuia bawlhhlawh báwm kal thei (garbage trailer), thoin nasa taka a bawm hmun hrang hranga awmte tihtawp a nih thu sawiin Zodintluanga chuan, “Hmun laili tak takah hnawk leh tenawm takin garbage trailer a awm a, tihtawp kan duh a, kan titawp a ni," a ti a; public private partnership (PPP) mode hmangin mipuiin bawlhhlawh paihna pawisa thawhin department nena ṭang dunin bawlhhlawh paih a nih thu a sawi.

UDPA Minister chuan, UDPA department chu Innovation India, Indian Film Festival buatsaih ṭhinte nen thawk dun tura an inbiak mek thu sawiin, "January 2018 thla chawhnu lamah Mizoramah Indian Film Festival neih kan tum a ni. He hunah hian faina pual video tawi siam intihsiakna kan buatsaih dawn a, a ti ṭha zual pathum chu India Film Festival-ah chhuah ve a ni ang," a ti.

Minister Zodintluanga hian Biate khaw fai lawm­pui nan Biate V/C Presi­dent hnenah sorkar aṭangin Rs. 50,00,000 hû project a hlan a; Biate ṭhenawm khaw dang - Khawhai, Sialhâwk, East Lungdar, Lêng leh tlangdung khaw hrang hrangte chu khaw fai tak vek an nih avangin, faina hmunpui ni zel turin a chah a ni.

Khualzahawm, minister Vanlalawmpuii Chawngthu, bialtu MLA pawhin thu sawiin, a bial chhunga khuate chu fai tak vek an ni tih a sawi a, Mizorama bial fai ber ni turin theihtawp chhuah turin a sáwm. “Faina lama pi leh pute lo kalpui tawh vawiin thlenga in la chhawm nung zel hi a ropui ka ti. Faina sawi chuan HIV lakah him a ngai a, nu leh pate’n kan fate lehkha zira an awmna chin hria ila, i fimkhur ang u,” a ti.

Biate khua hian UDPA department-in kumina district Headquarters leh census town khua zinga fai inelna a siamah khaw fai ber lawmman an dawng a ni.