Mizoramah raltlân an pung zel

Myanmar ram, Ra­khine state-a sorkar sipaite leh Arakan-a hel pawl sipai, Arakan army tia hriatte inbeih vanga Myanmar-a Zo hnahthlak raltlân, Mizorama rawn lut zat chu an pun belh zel a; he thu ziah lai thleng hian 1,300 vel an lut tawh nia thu dawn a ni.

Lawngtlai police hotute sawi danin, Myan­mar aṭanga Zo hnahthlak rawn raltlante hi khaw paliah dah an ni a; an luh tamna ber khua Laitlangah mi 540 an tling tawh a, Zochachhuahah mi 400 vel, Hmawngbuchhuahah mi 230 vel leh Dum­zautlangah mi 120 vel an awm bawk.

Mizorama raltlan rawn lutte hi Mizoram sorkar aiawhin Lawngtlai DC leh SP ten an thlithlai reng a; an awmna khuaa V/C leh police-te'n mumal takin an chhinchhiah vek a, an mamawh, ei tur leh awmna tur ngaihtuahsak an ni.

An ei leh in tur chung­changah Lawngtlai DC leh Food, Civil Supplies & Consumer Affairs Supply department Director-te'n ruahmanna an siam a, a ṭul angin a thlawna buhfai pek turin an ruahman.

Home minister R Lalzirliana chuan, ral­tlante hi Mizoram sorkarin ṭha taka lo tuamhlawm a tum thu leh, a ṭul chuan sorkar laipuiah hriattir a, ṭanpuina dil a nih tur thu a lo sawi tawh a; tun hnaia Myanmar-a inkahnaa hliam Arakan army mi panga chu Aizawlah enkawl mek a nih thu a sawi bawk.