JNV sawn chhuah phûtin mipui pungkhawm

JNV School, Mamit-in Mamit Dinthar Bazar building an luah an duh lohzia lantir nan nimin khan JNV School kawtah Mamit Hmarveng mipui an pungkhawm.

Mamit Hmarveng branch YMA secretary Lalropuia hnen aṭanga thu dawn danin, punkhawm hi Mamit Hmarveng V/C leh NGO hrang hrangte hmalaknaa huaihawt a ni a, Hmarveng V/C president Lalchhanthanga leh YMA president Lalawmpuia Chawhte ten thu an sawi.

Thu sawitute chuan, JNV chu hnawk an tih vang leh Mamita awm an remtih loh vanga pungkhawm an ni lo a, kut hnathawktute'n an thlai tharte an zawrhna hmun tura sorkarin a sak, Dinthar Market chu JNV-in an luah vanga kum 10 chuang an hman theih loh tawh vanga pungkhawm an nih thu an sawi.

Mamit Hmarveng V/C President chuan, Bazar building chu mipuiin hmang ve tawh se an duh thu sawiin, JNV awmna tura tih, Khiangthelha hna thawh mek chu zawh a nih thuai theih nana ṭan la turin thuneitute an phût tih a sawi a ni.

Mipui pungkhawmte chuan, JNV chu Bazar building aṭanga insawn chhuak tura an duhna leh JNV hmunhma peih a nih theih nan MAMCO-in a tih turte ti vat tura an duhna thuziak an keng a; resolution an siam bawk.

An resolution-ah chuan, JNV-in hostel atana an luah mek bazar building chu an chhuahsan thuai theih nan hma la tura thuneitute an phût thu te, Mamit Khiangthelha JNV building sak mek chu sak zawh thuai an phût thu te, bazar building chu JNV-in April 2018 ral hma ngeia an chhuahsan loh chuan an chungah eng harsatna pawh thleng se Hmarveng mipuiin mawh an phurh loh tur thute an tarlang a ni.