MJS-a tling tharte lawmpui

Mizoram Judicial Service (MJS)-a tun hnaia tling tharte zinga Mizoram Law College aṭanga zir chhuakte chu chu nimin khan Law & Judicial minister Lalsawta pisaah Mizoram Law College Alumni Association-in lawmpuina hun an hmang a, minister Lalsawta’n lawmpuina leh fuihna thu a sawi.

Minister Lalsawta chuan, Mizoram Law College-in zirlai hlawhtling tak tak a chher chhuak chu lawmawm a tih thu a sawi a; law graduate-te chu graduate dang aia hna hmuh an awlsam thu sawiin, "Hei hian subject thiam bik neih a pawimawhzia a tilang. Dan hriat hi min tibengvartu leh buaina kan tawh theih tam tak laka min chhan theitu a ni," a ti.

Law & Judicial Minister chuan, MJS-a tling tharte chu an kal zelna turah duhsakna a hlan a; dan chu hriat zawh leh hriat kim a awm theih loh avangin inchhiar zau a, intuaithar reng turin a chah a ni.

MJS tling thar, Mizoram Law College aṭang zir chhuakte hi mi pariat an ni a, hmeichhia paruk leh mipa pahnih an ni. Mizoram Law College hi kum 1983-ah din a ni a, law graduate 450 vel an chhuak tawh a ni.