Mamitah zangnadawmna sem

Mamit District Legal Services Authority (DLSA) chuan nimin khan The Mizoram Victims of Crime Compensation (Amendment) Scheme, 2016 hnuaiah Mamit district-a mipat hmeichhiatna kawnga tawhsual tâwkte leh tual­thahna vanga tawhsual tâwk chhungte hnenah zangnadawmna an sem.

Zangnadawmna sem inkhawm hi Mamit DC conference hall-ah neih a ni a, zangnadawmnate chu a dawngtute hnen­ah Mamit DC Lal­biaksangi'n a hlan. Zâng­na­dawmna hi a vaiin cheng nuai 39 sem chhuah a ni a, ṭanpuina dawngtute chu an harsatna tawh dan azirin an sum dawn a inang lo.

Mamit DC chuan, tawhsual tâwkte chu hun harsa paltlang an ni tih a sawi a, an harsatna tawh chu an hma lam huna chhelna leh tumruhna petu atan hmang tur leh an hmalam thlir thiam a, zirna kawngah ṭan la a, hma lam hun chhuanawm taka hmang turin a fuih.

Mamit chief judicial magistrate Gracy L Bawihtlung pawhin thu sawiin, Mamit DLSA chuan tunah hian The Mizoram Victims of Crime Compensation (Amendment) Scheme hnuaiah zangnadawmna dilna 10 an dawng leh tawh tih a sawi a ni.