Dist. Bawrhsap hoin Serchhipah Sentût leh thaksep danna pek dan tur rel

Serchhip District Immunization Task Force Committee chu nimin khan an chairman Sangchhin Chinzah, district bawrhsap hoin a pisaah an ṭhukhawm a; January 2018 aṭanga Measles & Rubella (sentut leh thaksep) danna damdawi pek beihpui thlak dan tur an rel.

Sangchhin Chinzah chuan, ṭhangtharte an hrisel theih nan sorkar­in hri danna ṭha tak tak a pe ṭhin tih sawiin, sentut danna pawh hun rei tak aṭanga kalpui ṭhin a nih thu a sawi a, "Tun ṭuma vaccine pek tur hi chu a chi thar leh ṭha zawk, sentût chauh ni lo, thaksep chi dang hrim hrim laka invenna tur a nih avangin a pawimawh zual. Kan district-a nausen thla 9 aṭanga tleirawl kum 15 inkar zawng zawngin kokim taka an lak ngei a pawimawh," a ti.

Vaccine hi January 18, 2018 aṭangin Mizoram pumah pek ṭan a ni dawn a, ni 30 chhungin nausen thla 9 aṭanga tleirawl 15 inkar zawng zawng pek vek tura tih a ni. A tir hapta hnih chhung chu zirna-in zawng zawngah pek tur a ni a, a dawt hapta hnih chhung chu vantlang/khawtlangah kalpui a ni ang a, hapta nganaah a thualna neih a ni ang.

Nimina Serchhipa meeting-ah hian Ser­chhip district-a sorkar department hotu te, School Education department leh Social Welfare department hotute leh member dangte an tel a ni.

Sentut vangin kum 2015 chhung khan khawvelah naupang 1,34,000 an thi a, India ramah naupang 47,000 an thi nia tarlan a ni a; sorkar laipui chuan India ramah sentût leh a kaihhnawih thaksep chu kum 2020 hmaa ûm bo tumin ṭan a la mek a ni.