Kolasib-ah Vision 2030 chungchang zirho

Economics & Statistics chuan nimin khan Kolasib DC Conference Hall-ah ni hnih awh tur, Vision 2030 leh official statistics chungchangah inhrilh­hriatna an buatsaih a; Kolasib DC R Zarzosanga'n a hmanpui.

Kolasib DC chuan, khawvel hmasawn zelah statistics dik leh rintlak a pawimawh thu sawiin, department hrang hrangin an department kaihhnawiha data/statistics inang lo leh inperhsan tak an siam ṭhin chuan hna thawhna leh rua­hmanna siamna kawngah harsatna a thlen ṭhin thu a sawi a, "Sorkar tana state level action plan felfai leh rintlak tak nei tur chuan database rintlak a pawimawh," a ti.

Workshop-ah hian Economics and Statistics director Lalchhuanawma Hrahsel-in Vision 2030 chungchang a sawifiah a; Vision 2030 chu sorkar laipuia NITI Aayog ruahman a nih thu leh chumi hmang chuan India rama state zawng zawngte tana state vision siam vek tur tih an nih thu a sawi.

Lalchhuanawma Hrahsel chuan, kum 2030-a Mizoramin a target thlen tum chu state vision document-a siam tur a nih thu a sawi a; state vision document chu 3-7-15 Formula (3 years action plan, 7 years strategy, 15 years vision) hmanga siam tur a nih thu leh, chumi hmanga Mizoram sorkar department hrang hrangin plan/vision document an siam chu Planning & Programme Implementation Department leh Economics & Statistics department-in an lo khaikhawm dawn thu a sawi bawk.

Workshop-ah hian resource person hrang hrangin thupui hrang hrang hmangin thil pawimawhte an zirtir a; Mizoram district pariat aṭangin District Research Officer, Research Officer (Directorate), Statistical Inpector leh Sub-Inspector-te telin, vawiinah chhunzawm a ni ang.