KHAWTHLIR

Heroin man
Excise & Narcotics department-a Anti-Narcotics Squad chuan nimin chhun dar 12 khan Ṭhuampuiah heroin gram 12 leh a neitua puh Lalramliana (39) h/o Hmingthanliani, Ṭhuampui an man. Lalramliana hi NDPS Act tlawhchhanin thubuai an siamsak a ni.

Vawk notê sem
AH&Vety department chuan nimin khan Lunglei Farm Venga AH&Vety Complex-ah an department hnuaia NLUP ṭanpuina dawngtute hnenah NLUP third phase leh fourth phase ṭanpuina an sem. Ṭanpuina semnaah hian veng hrang hranga chhungkaw 230 hnenah vawk notê 1,155 pek a ni.

NEDP Tour
IPR department buatsaihin hmun hrang hrangah NEDP Press Study Tour kalpui mek zel a ni. Gujarat-a press tour neia kalte chu nimin khan Aizawlah an rawn let a, vawiinah team dangin Himachal Pradesh tlawh turin Aizawl an chhuahsan leh ang. Siaha district MJA member-te'n Mamit district-a sorkar hmalaknate an fang kual mek bawk. Hetih lai hian, Aizawl East-II biala MUP member-te chu Tuirial Hydel Project tlawh turin nimin khan an chhuak a ni.

MMU meeting
National Health Mission (NHM) hnuaia Mobile Medical Unit (MMU)-te chuan nimin khan review meeting an nei a; kumin chhunga an kalphungte an thlirlet bakah, thil pawimawhte an inzirtir. MMU Training cum Review Meeting hi MMU state nodal officer Dr Pachuau Lalmalsawma'n a kaihruai a, NHM state programme manager Dr Lalthantluanga'n fuihna thu sawiin, sum indaih loh vanga MMU-in harsatna tam tak an tawh mek laia thatho taka thawktute an che chhuak thei zel chu fakawm a tih thu a sawi.