Economy hmasawn nan mau a ṭhat thu CM-in Union Minister a hrilh
Zan hnih riaka Mizorama rawn zin Union minister of state Ashwini Kumar Choubey leh chief minister Zoramthanga chu nimin khan CM bangla-ah an inkâwm a; Chief Minister chuan, Mizoram economy hmasawnna atan mau a ṭhat thu a lo hrilh.
Ashwini Kumar Choubey hian nimina Mizoram BJP pisaa thuthar thehdarhtute a kawmnaah CM nena an inkawmnaa an thusawite a sawi chhuak a, "Minute 30 vel kan inkâwm a, chu'ng zinga minute 20 velah chuan economy tihhmasawnna dan tur chungchang kan sawi dun," a ti.
CM Zoramthanga'n Mizoram maute chu a têt thu a lo hrilh tih sawiin Union Minister chuan, "Tissue culture hmanga siam mau an chìn dawn thu leh chu'ngte chu ft. 50-60 te a tlin theih thu a lo sawi," a ti a; mau hmangin ram hectare 2-a zauah Rs 5,00,00 vel kum khatah thar theih a nih thu a lo hrilh tih a sawi.
Chief Minister-in Union Minister a hrilh danin, mau hmanga hmalakna-ah Mizoramin harsatna a tawh ber chu kawng a ni a, kawng sialna tur sum mamawh a ni.
Sorkar laipuia Environment, Forest & Climate Change changtu minister Ashwini Kumar Choubey sawi danin, Chief Minister thusawi bawhzuiin sorkar laipui aṭangin Mizoramah mithiam an rawn kal dawn a, CM thil sawi chu a ṭhat dawn leh dawn loh an zir chiang dawn. A ṭhat dawn chuan sorkar laipuiin a ṭul angin Mizoram a pui dawn a ni.
Chief Minister hnenah ram a dil thu sawiin Consumer Affairs leh Food & Public Distribution changtu minister Ashwin Kumar chuan, "FCI regional office dinna atan leh central warehousing corporation dinna atan ram ka dil," a ti a, ram pek an nih ngei tur thuin Chief Minister-in a lo chhan thu a sawi.
Union Minister chuan, Food, Civil Supplies & Consumer Affairs hotute'n buhfai phurhna man bâ chungchang a hnena an lo thlen thu sawiin, "Sorkar laipuia official-te ka be nghal a, cheng vbc. 80 vel bá aṭangin 80% an rawn pe chhuak nghal. 20% dang pawh December 15, 2022 hmain pek chhuah a ni ang," a ti.
Ashwini Kumar sawi danin, Prime Minister-in hmarchhak state-te a ngai pawimawh a, minister-te chu hmarchhak state tlawh a, mipui mamawh, ram mamawh, central scheme tihhlawhtlin dan, state-te thawhpui theih dan tur zir chiang turin a ti a ni. An zin hnuah PM-in minister-te chu review meeting a neihpui a, hmalak dan tur an ngaihtuah ṭhin.
Union Minister chuan, sorkar laipuiin scheme ṭha tak tak eng emaw zat a neih thu sawiin, "Hengte hian mi náwlpui a la thleng lo. Mi zawng zawng a thlen loh chuan hmasawnna a kal rual theih dawn loh avangin thleng ngei se kan duh," a ti a; scheme hrang hrangte'n mi zawng zawng a thlen theihna atan theihtawp chhuah a ṭul thu a sawi bawk.