PwD pual Special Enrolment Camp

Election department chuan nimin khan Assembly Annexe conference hall-ah rualbanlo voter-te tan Special Enrolment Camp for Persons with Disabilities (PwDs) Voters an buatsaih a, Mizoram PwD commi­ssioner Vanlaldiki Sailo-in a hmanpui.

Special Camp-ah hian mithiamte'n vote thlak chungchang an zirtir a, PwD eng emaw zatin electoral roll-ah an hming an ziak lut a ni.

Vanlaldiki Sailo chuan, infiamna chi hrang hrangah rualbanlote an tel tam theih dan tur ngaihtuah turin Sports department an ngen thu a sawi a, "City bus-ah ‘Reserve for PwD’ sticker tàr vek a ni tawh a, secondary school leh elementary school zirlaibu siamtu MBSE leh SCERT-te'n mit ṭha lo tan large print leh mitdelte tan braille textbook an siam tawh," a ti.

Vanlaldiki chuan, kal ṭha thei lo, scooty three wheeler hmangte tan tlàn loh ní awm lo turin Traffic SP hnenah mi 17 dilsak a nih tawh thu leh special permit pek an nih thu leh, Mizoram State Award for Empowerment of PwD sem a nih dawn thute a sawi bawk.