Ramri chungchangah inbe zui zel turin kan inthlah - Ruatkima

Minister of state leh MNF adviser Lalruatkima chuan, ramri chungchangah Assam sorkar nen inbe chhunzawm turin an inthlah thu a sawi.

Lalruatkima hian nimina Aizawl West-II MNF Block conference-ah thu sawiin, Assam-in ramri chungchang ziakin an la rawn thlen ngai lo niin a sawi a, "State pahnih karah political talk a la awm ngai lo. Keini lamin BEFR 1875 kan ṭan chhan a, anni'n an pawm lo. Amaherawhchu, census nei tur leh inbiak chhunzawm turin kan inthlah a ni," a ti.

MNF Adviser chuan, Mizoram leh Assam ramri chingfel turin chief minister Zoramthanga kaihhruai sorkar a ṭha ber nia sawiin, "Pu Zoramthanga hi inremna palai atan symbol a ni a, India sorkar pawhin a mamawh tak zet. Vision thui tak neiin hma a la a ni," a ti a; thei nia inngai chuan an ti hrâm zel a, thei lo nia inngaite'n hmalak ngaihna an hre lo tih a sawi.

Lalruatkima chuan, CM Zoramthanga chu eptute'n nuih ṭhin mah se, a kaihhruai sorkarah chuan Union budget-ah bamboo link road leh by-pass road tur a chhuak thei tih sawiin, "Hetiang hi a la awm ngai lo," a ti.