Kut hnathawktute chawi chhuah hi kan thil tum pawimawh a ni - Lalsawta

Congress party presi­dent Lalsawta chuan, kut hnathawktute chawi chhuah chu an thil tum pawimawh tak a nih thu leh, an sorkar a nih chuan ṭha zawk leh changtlung zawkin Primary Agricultural Credit Societies (PACS) kalpui an tum thu a sawi.

Lalsawta hian Novem­ber 22, Thawhlehni khan Ratu khuaa PACS zir chiangin hun a hmang a, thu sawiin, "Kut hnathawktute chawi chhuah hi kan thil tum pawimawh tak a ni a, miretheite chawi chhuahna atana thil pawimawh hmasa nia kan hriat apiangah kan kal nghal dawn," a ti.

Mizoram economy siamṭha turin ngaihtuahna an séng nasa tih sawiin Lalsawta chuan, "Kan ram economy bul ṭanna atana pawimawh tak a nih beiseiin PACS kan zir chiang a ni. PACS hi kut hnathawktute chawi chhuahna atana thil pawimawh a ni tih kan hria," a ti a; sorkarna an chang a nih chuan ṭha zawk leh changtlung zawkin PACS kalpui an tum thu a sawi a ni.

Ratu PACS hnuaiah hian account nei mi 1,111 leh share holder mi 411 an awm a; NABARD-in motor leh aieng herna kháwl a pe a ni.