MAMCO managing director nihna hmanga contract leh supply pek tiam a, thamna cheng nuai 268 latu Lalremthanga, Lunglei Chanmari chu kum nga chhung jail-a táng tur leh cheng nuai 15 chawi turin Court-in a hrem.
Mizoram Agriculture Marke­ting Corporation Ltd (MAMCO) managing director ṭhin Lalremthanga s/o K Pahlira (L), Lunglei Chan­mari chu Dr HTC Lal-rin­chhana ṭhutna Special Court (Preven­tion of Corrup­tion Act) chuan IPC Section 120B/420/468/471 leh PC Act Section 13(2) leh Section 13(1)(d) tlawh­chhanin nimin khan thiam loh a chantir a, hremna tur tihchhuah nghal a ni. 
Special Court chuan, Lalremthanga ukil leh sorkar ukil (Additional Public Prosecutor)-te ngenna a ngaihthlâk hnuah Supreme Court thutlukna lo awm tawhte thlir chungin hremna turah thutlukna a siam. IPC 420 (r/w 120B/471) hnuaiah kum nga chhung táng tur leh Rs 5,00,000 cháwi turin a ti a, pawisa a chàwi loh chuan kum nga dang tàn belh turin a ti a ni.
IPC Section 468 (r/w 120B/471) hnuaiah kum nga chhung táng tur leh Rs 5,00,000 chawi turin a ti a; pawisa a chawi loh chuan kum nga dang tàn belh turin a ti a; PC Act Section 13(2) (r/w 13(1)(d)) hnuaiah kum nga chhung tàng tur leh Rs 5,00,000 chawi turin a ti a, pawisa a chawi loh chuan kum nga dang tàn belh turin a ti bawk.
Hetih lai hian, Spe­cial Court chuan Lalrem­thanga chu criminal case a neih vawi khatna a nih avangin, hremnaa a tàn hun chhung tur bik chu a hranpa ṭheuha kal loin, ṭum khata tlâk turin a ti a; pawisa chawi tura hremna erawh chu belh­khawm tur niin, Rs 15,00,000 chawi turin a ti thung. 
Lalremthanga tàn hun chhung turah hian thubuai ngaihtuah a nih chhunga a lo tàn tawhna (judicial custody-a awm tawhna)-te chu paih tura tih a ni bawk.