KHAWTHLIR

ZPM-in Ṭhalai President ruat thar
ZPM General Headquarters chuan ZPM Ṭhalai Headquarters president atan Dr C Lalrammawia a ruat. Dr C Lalrammawia hi ZPM Ṭhalai senior vice president ni lai a ni a, ZPM Ṭhalai president kal chhuak Malsawmzuala Ralte, AMC corporator a thlak dawn a ni. Malsawmzuala hi ZPM Gen. Hqrs-ah general secretary a ni thung ang.

YMA-in thisen pe
YMA, ITI Veng Branch chuan nimin khan Civil Hospital, Aizawl tan thisen unit 19 an pe a, petute mipa 14 leh hmeichhia panga an ni.

Flower Show
Kolasib bawrhsap John LT Sanga chuan nimin khan DC Circuit House-ah Flower Show 2022 a hawng. Flower Show hi Horticulture department leh Kolasib District Florist Association buatsaih a ni a, mi 18-in pangpar chi hrang hrang an pho chhuak a ni.

UPC office hawng
Mizoram UPC main office building thar, Assembly Centre, Zonuama mi chu nimin khan UPC executive chairman Upa C Lalropianga’n a hawng. In hi April 13, 2021-ah sak ṭan a ni a, square metre 1,599.16-a zau niin, chhawng nga a ni.

Tlawng lui sawiho
Planning Board vice chairman H Rammawi kaihhruaiin nimin khan Planning Committee Room-ah Tlawng lui leh a péng luite humhalh dan tur sawiho a ni.

Jubilee lawm
MPCC treasurer Zodintluanga Ralte, MLA chuan nimin khan a bial chhunga Rotlang West khuain an khaw kum 50-na, golden jubilee an lawmna a hmanpui.Rotlang West hi Lunglei aṭanga km. 41-a hláa awm a ni a, chhungkua 163 awmin, mi 782 an cheng mek.