Kum nga chhungin mahni kea ding thei turin puih kan tum - Duhoma

ZPM hruaitute chuan Hachhek bial an fang mek a, ZPM leader Lalduhoma chuan, sorkarna an siam chuan kum nga chhungin chhungkuate mahni kea ding thei tura puih an tum thu leh loan lâknaa sorkar hnathawkte guarantor-a ṭan sorkarin a khapna chu siamṭhat an tum thu a sawi.

Nimina Hriphaw khuaa vantlang inkhawmah thu sawiin Lalduhoma chuan, Mizoram mipui dinhmun chawi kâng tura an hmalakna turte a sawi a, "Mizoram sorkarin guarantor-a sorkar ṭan a khapna dan pawh siamṭhat kan tum. Kum nga chhungin chhungkua te mahni kea ding thei turin sorkarin puih a tum a ni," a ti.

Policy leh manifesto eng anga ṭha pawh Pathian duh dan a nih loh chuan engtihna mah a ni lo tih sawiin Duhoma chuan, "Pathian thupek hi leia tih tur a ni," a ti. An party leh sorkar uaptu tur Val Upa Council an neih thu sawiin, "Lokayukta kan thuam chak dawn a, CBI kan ko lut dawn. CBI duh leh duh lo, eirûk tihtawp duh leh duh lo kan inhmachhawn dawn," a ti bawk.

ZPM working president K Sapdanga pawhin thu sawiin, "Keini party hi naupang tê kan ni a, chuti chungin tawnhriat ngah zawkte'n min kaihruai a, tawnhriat nei tlem zawkte pawh min finchhuah zel a ni," a ti a; an kalna hmun tina mipui che vel a taka an hmuhin lawmawm an tih thu a sawi.