Zobawk Sports Academy siàm titawp turin NGT-in Mizoram sorkar a hriattir

National Green Tribunal (NGT) chuan, Sports & Youth Services department-in Zobawk dái, Tlawng hnára Sports Academy tur a siam mek chu chawlhsan turin Mizoram sorkar a hriattir a; January 5, 2023-a ngaihtuah nawn leh turin a dah.

Zobawka Sports Academy siam mek chungchangah hian Tlawng lui kam leh hnár a nih avang leh forest clearance la loa siam a nih avangin Vanramchhuangi, Chaltlang chuan tihtawp a nih theih nan a ukil kaltlangin NGT-ah a thlen a ni.

NGT Eastern Bench-ah judicial member Justice B Amit Sthalekar leh expert member Prof. A Senthil Vel-te chuan an ngaihtuah hnuah, November 21, 2022 khan order tichhuakin, Mizoram sorkar chu hna thawh mek chawlhsan turin a hriattir a ni.

NGT order-a a lan danin, NGT-in thupek a chhuah chungchangah hian sorkar laipui leh Mizoram sorkara a kaihhnawih thuneitute chu order chhuah aṭanga chawlhkar li chhungin counter-affidavit thehlut tura tih an ni a; January 5, 2023-ah ngaihtuah leh tura tih niin, NGT-in a ngaihtuah leh hma chuan Sports Academy siam mek chu chawlhsan tura tih a ni.

Thu dawn danin, he thubuaiah hian respondent no. 1 chu sorkar laipuia EFCC Secretary a ni a, Mizoram Chief Secretary chu respondent no. 2 a ni. Mizoram PCCF chu respondent no. 3 a ni a, Sports department Director chu respondent no. 4 niin, Lungleia Land Revenue & Settlement department-a Settlement Officer chu respondent no. 5 a ni.

ZOBAWK SPORTS ACADEMY LEH A BEHBAWM
* Sports Academy siamnaah forest clearance awm loa kutthlak a nih avangin Environment, Forests and Climate Change (EFCC) department-a Lunglei Divisional Forest Officer chuan July 5, 2021 khan Lunglei District Sports & Youth Services Officer hnenah kutthlak tawh lo turin a hriattir.
* Lunglei DFO-in September 1, 2021-ah Lunglei SYS Officer hnenah kutthlak lo tur leh forest clearance la hmasa turin a hriattir nawn. SYS lamin tun thlengin an la bawhzui lo.
* Lunglei DFO-in December 22, 2021-ah Lungleia SYS Officer chu a hriattir nawn leh.
* December 22, 2021-ah EFCC Additional Principal Chief Conservator of Forests-in SYS Director hnenah lehkha a thawn a, forest clearance dil turin a hriattir.
* Lunglei DFO-in January 25, 2022 khan Lungleia Land Revenue & Settlement Officer hnenah lehkha a thawn a, Sports Academy siam mek chu dan loa kutthlak a nih avangin ram pass zawng zawng cancel turin a ngen.
* Lunglei DFO-in January 25, 2022 khan Lungleia SYS Officer hnenah lehkha thawn lehin, Sports Academy siam hna titawp turin a hriattir nawn leh bawk.
* Sorkar laipuia EFCC Ministry-in July 18, 2022-ah Mizoram sorkara EFCC Secretary hnenah lehkha a thawn a, dan loa Sports Academy siam mek titawp tur leh, Forest (Conservation) Act, 1980 hnuaiah dan anga hma la turin a hriattir; hmalakna report EFCC Ministry-ah thehlut turin a hriattir nghal.
* Tlawng lui hnára forest reserved chhunga dan loa quarry siama lung lâk a nih avangin Lunglei DFO-in lung latu, Malsawma Murray, Lunglei Chanmari leh mi dang 10 chu lung la tawh lo tur leh, lung an la zui zel a nih chuan dan anga hrem theih an nih thu, August 12, 2021-ah a hriattir.