AR sipaite hnenah medal hlân

2nd Assam Rifles chuan nimin khan Raj Bhavan-a circular lawn-ah Assam Rifles’ Investiture Ceremony an hmang a, khuallian Governor Hari Babu Kambhampati-a'n Assam Rifles sipai 18 hnenah chawimawina tangkapui leh thuchei a hlân.

Inkhawm hi Assam Rifles 23 Sector leh Inspector General Assam Rifles (East) headquarters-te buatsaih a ni a; mi 11-in Governor’s Gold Medal leh mi pasarihin Governor’s Silver Medal an dawnte chu Larsapin a hlan. 2nd Assam Rifles leh 8th Assam Rifles-te hnenah hna thawk ṭha chawimawina a hlan bawk.

Hari Babu Kambham­pati chuan, AR Investiture Ceremony-ah ram veng himtu sipai chhuanawm tak tak 18-in chawimawina an dawng thei chu lawm­awm a tih thu a sawi a, "Ram mipuite'n India sipai huaisente kan thlamuanpui a, ram venhimna leh ram inpumkhatna atana theihtawp chhuah zel ang che u," a ti.

Governor chuan, Mizoram leh hmarchhak bialah AR an awm rei tawh thu leh sûlhlu ṭha tak tak an hnutchhiah tawh thu a sawi a; civic action programme hnuaia thingtlang kilkhâwr zawka chengte tan a thlâwna inentirna an buatsaih ṭhin chu ṭha a tih thu a sawi bawk.