Union Miniser-in Speaker leh CM a kâwm

Union Consumer Affairs, Food & Public Distribution minister of state Ashwini Kumar Choubey chuan, November 22, Thawhlehni tlai khan Mizoram Legislative Assembly a tlawh a, speaker Lalrinliana Sailo nen an inkâwm bakah, Assembly House a fang.

Speaker Lalrinliana Sailo chuan, Mizoram Assembly dinhmun leh hmalaknate lo hrilhin, e-Vidhan project hnuaiah lehkha tel loin rorelna an kalpui thuai dawn thu a sawi a; Mizorama hmasawnna hnathawhte'n leilung an tichereu ṭhin chu pawi a tih thu sawiin, hmalakpui turin a ngen.

Ashwini Kumar Choubey chuan, ram leilung venhim leh hmasawnna hnathawhte kal kawptir thiam a ngaih thu sawiin, kum 70 liam ta chhunga hmarchhak harsatnate chu hun rei lo tê chhunga chinfelsak an tum thu a sawi a; khawpui chhunga ramngaw siamna tur Nagar Van Scheme chu municipal neite chauh huam tura duan ni mah se, Mizoram district zawng zawng huamtir vek a nih thu a sawi bawk.

Union Minister hian nimin khan chief minister Zoramthanga chu CM Banglaah a kâwm bawk a; Mizoram leh India hmarchhak state-te'n thing leh mau hausakna an neih chu economy hmasawnna atana ṭangkai taka hman theih dan tur leh mau hmanga economy chawisan theih dan turte an sawi dun niin sorkar thuchhuahin a tarlang.