Aizawla LC-te'n inkhawmpui an hmang

Aizawl City Local Coun­cil Association (ACLCA) chuan nimin khan Vanapa Hall-ah General Assembly vawi thumna an hmang a, deputy chief minister Tawnluia'n a hmanpui. Tawnluia chuan, SEDP thawh khatna sem mek a ni a, a thawh hnihna sem a nih leh theih nan a dawng­tute'n hma an lak dan endik mek a nih thu a sawi.

Deputy Chief Minister chuan, local council member-te chu Aizawl khawpui inrêlbàwlnaa mipui hne hnai ber, a bulṭhut leh a lungphûm pawimawh an nih thu a sawi a, "Hmun hrang hrangah SEDP thawh khatna sem mek a ni a, a thawh hnihna sem a nih leh theih nan a dawngtute'n hma an la em tih endik mek a ni. A nih tur ang taka SEDP sum hman a nih theih nan LC-te'n in huam chhung ṭheuhah lo vil ang che u," a ti.

Tawnluia chuan, Lunglei Municipal Council din turin ruahmanna siam fel vek a nih tawh thu te, Chief Executive Officer leh thawktu dangte'n hna an zawm tawh thu te, November 22, 2022-a Cabinet Meeting-in LMC inkaihhruaina tur siamte a pawm thute a sawi.

Khualzahawm Aizawl mayor Lalrinenga Sailo chuan, AMC office buil­ding-ah local council office siam mek a nih thu a sawi a; AMC revenue aṭangin LC member-te thla ruk lawmman pek remtih a nih tawh thu a sawi bawk.