FCSCA bill vbc. 29 chinfel thuai tum

Union Consumer Affairs, Food & Public Distribution minister of state Ashwini Kumar Choubey chuan, Mizo­ram sorkara Food, Civil Supplies and Consumer Affairs (FCSCA) department bill sorkar laipuia la táng cheng vbc. 29 chu chinfel thuai a nih tur thu sawiin, "Cheng vbc. 11.5 chu kumin December 15 ral hmain pek chhuah a ni ang," a ti.

Union Minister hian November 22, 2022 khan FCSCA department hotu te, Food Corporation of India, Bureau of Indian Standards leh Central Warehousing Corporation hotute a ṭhutkhawmpui a; hmalakna chi hrang hrang an thlir lêt a ni.

FCSCA secretary Ramdinliani kaihhruai ṭhutkhawmah hian FCSCA, FCI, BIS leh Central Warehousing Corporation aiawhte'n an hmalakna leh harsatnate Union Minister hnenah an thlen a; Minister chuan, a theih ang anga chinfel dan zawn a nih tur thu a sawi.

EFCC minister ni bawk Ashwini Kumar Choubey hian Environment, Forests & Climate Change (EFCC) department leh Mizoram Polution Control Board (MPCB) hotute Chief Wildlife Warden pisaah a ṭhutkhawmpui bawk a; carbon credit leh eco-tourism-ahte eco-task force din a nih theih nan project thehlut tur leh Jal Shakti hnuaiah lui humhalhna tur project thehlut tur te, EFCC hnuaia IFS post ruakte hnawhkhah a nih theih nan sorkar laipuiah rawtna thlen turin EFCC hotute a hriattir.

Ṭhutkhawmah hian Mizoram EFCC minister TJ Lalnuntluanga'n harsatna an tawhte Union Minister hnenah a thlen a; hmasawnna hna thawhnaa harsatna thlentu forest clearance la turin EFCC department-in hma an la ṭhin a, Parivesh Portal-ah harsatna a awm ṭhin avangin a hun takah forest clearance pek a nih loh ṭhin thu sawiin, central EFCC ministry-in an tih tur an tih ve zung zung theih nan hma la turin a ngen.

TJ Lalnuntluanga chuan, IFMIS-ah sorkar a luh mek avangin sum leh pai chêt vel dan inthlâkthlengin a nghawng CSS-a Mizoramin sum a hmuh tur a hun taka a hmuh theih loh thu leh technical thilah harsatna an tâwk tih sawiin, hmasawnna hna thawhna tur sum a hun taka pe chhuak turin a ngen a; sorkar laipui scheme hnuaia Mizorama thawkte'n a hun taka hlawh an lak theih nan hma la turin a ngen bawk.

Ashwini Kumar Choubey chuan, sorkar laipuiin Mizorama hmasawnna hna a thawh mekah harsatna awmte chinfel a nih theih nan theihtawp a chhuah tur thu a sawi a ni.

Union Minister hian nimin chawhma khan BJP, Mizoram Pradesh pisaah thuthar thehdarhtute a kâwm a, nimin vêk khan Mizoram a chhuahsan a ni.