Congress minister/MLA-te bàn chhan Congress party ṭhalaite'n an sawifiah
Congress ṭhalaite chuan thuchhuah siamin, Congress party-in thuneihna an chan laia minister ṭhenkhatin bànna an thehluh chhan chu, puh an nihna zalen taka chhui an ngam vang a nih thu an tarlang a; MNF sorkara minister-te chu puh an nihnaah an báng ve ngam dawn em, tiin an zawt.
MPYCC chuan, MNF vice president Lalthlengliana'n November 21, 2022-a Hnam Rûna thu a sawiah, Congress kum 10 rorel chhungin corruption kaihhnawih vangin minister pahnih leh MYC chairman an báng tih a sawi an chháng lêt a; "Bànna an thehluh chhan kha puh an nihnaah a chhuitu tura ruatte'n zalen taka an chhui theihna tura bànna thehlut an ni. MNF minister-te hian an ngam ve dawn em?" an ti.
Congress sorkar laia Health minister Lal Thanzara chu minister a nihna mai ni lo, MLA thlenga bànna thehlut ngam a nih thu te, minister of state Lalrinmawia Ralte chu chhui a nih theih nan minister aṭanga bànna thehlut a nih thu te, MYC chairman T Sangkunga, MLA pawh huaisen taka bànna thehlut ngam a nih thu an tarlang a; seal lem siama puh RL Pianmawia chu rorelna hmachhawn ngamin jail lut mah se, thiam lohna a neih loh avangin Tuivawl bial mipuiin pangpar ṭhi nen an lo hmuak tih an tarlang.
MPYCC tarlan danin, State Technical Entrance Examination-ah buaina a awm avangin May 11, 2010 khan High & Technical Education minister Lalsawta'n amahin eng mah khawih lo mah se, a changtu minister a nih angin CM hnenah bànna a thehlut a ni. May 3, 2012 khan Transport minister PC Zoram Sangliana (L) pawhin MST bus chetsual vangin bànna a thehlut bawk.
Congress ṭhalaite chuan, Mizoram sum dinhmun chhe em em te, Lengpui Airport sak lai chim chungchangah te, tender tel loa hna lian inpek te, Aviation sum chhehrelh te, corruption ni ngeia ngaih theih thil tam tak inphûmte chu Finance leh PWD enkawltu Chief Minister tàn bànna thehluh ngei ngeina tur nia an ngaih thu an sawi a, "MNF sorkar Pu Zoramthanga kaihhruaina hnuaiah hian mipuite'n ṭah leh haṭhialna hun kan hmang rei ta," an ti.