President-in Mizoram a rawn tlawh Remna leh muanna in nei hi in fakawm- Ram Nath Kovind

President Ram Nath Kovind chuan nimin khan zan khat riak turin Aizawl a rawn thleng a, nimin tlai khan Raj Bhavan-ah Housing Complexes for Economoically Weaker Section under Basic Services to Urban Poor (BSUP) Schemes, mi retheite tana chenna tur in sak a hawng. President chuan, Mizoramin remna leh muanna ṭha tak a nei chu fakawm a tih thu a sawi.

India President hian nimin khan Indian Air Force thlawhtheihna hmangin Lengpui Airport a rawn thleng a, Airport-ah hian Governor Lt. Gen. Nirbhay Sharma leh chief minister Lal Thanhawla ten an lo hmuak a, helicopter hmangin Ṭhuampui helipad-ah an rawn ṭum.

Helipad-ah hian President hi minister H Rohluna, chief secretary Lalmalsawma leh DGP Thianghlima Pachuau ten lo hmuakin, a bika lirthei ruahman hmangin Raj Bhavan panpui a ni.

Nimin tlai dar 4:30 khan Ram Nath Kovind hian Raj Bhavan-ah Housing Complexes for Economoically Weaker Section under Basic Services to Urban Poor (BSUP) Schemes a hawng.

President chuan, Mizoram a tlawh vawi khatna a nih thu sawiin, "Vawi khat ka rawn tlawhna hi mi harsate'n an hlâwkpui ngei ka beisei. Miretheite chenna in tur sak a, khawpuia chêng tihpun hi ram tana chona a ni. BSUP scheme hi sorkar laipui flagship proramme a ni a, miretheite tana in sak hian India thar a siam thei dawn a ni," a ti a; Mizoram thar tel lo chuan India thar siam theih a nih loh thu a sawi.

Mizo mipuite'n society ṭha tak an neih thu sawiin Ram Nath Kovind chuan, "Remna leh muanna kenkawh ṭhat kawngah Mizoram hi role model a ni. Kum 1986-a remna thutlung siam kha in zawm ṭh a, helna (insurgency) a bo nghal. Remna leh muanna in neih ṭhat em em dan hi thil mak a tling a ni. Mizo mipui, kohhran, ṭhalai, civil society, political party leh NGO-te ka lawmpui cheu a, in lungrualna ka fak a ni," a ti.

Ram Nath Kovind chuan, Mizo ṭhalaite'n theihna an neih ṭhat thu sawiin, "Football lamah pawh kum 2014-ah Santosh Trophy, kum 2015-ah National Games-ah in champion thei a, Aizawl FC pawh hmarchhak club zinga I-League champion hmasa ber a ni thei a ni," a ti a; Mizo ṭhalaite'n hma lam hun êng tak an neia a hriat thu a sawi.

BSUP scheme hawn inkhawm­ah hian chief secretary Lalmal­sawma'n thu hma a sawi a; UDPA secretary Dr C Vanlalramsanga'n BSUP scheme kalpui dan, hnathawh dan, hna thawhna atana sum hman a nih dante leh thil pawimawh hrang hrang a sawifiah.

President-in a hawn tâk BSUP scheme hnuaiah hian mirethei, chenna tur in nei lote chenna atan Lawipu-ah chhungkaw 408 chen theihna, Durtlangah chhungkaw 320 chen theihna, Rang­vamualah chhungkaw 160 chen theihna leh Edenthar Vengah chhungkaw 208 chen theihnate sak a ni.

Ram Nath Kovind hian nizan khan Governor, Chief Minister leh Council of Minister-te a kawm a, Raj Bhavan-ah a riak a ni. Vawiinah prominent citizen leh NGO hruaitute a kawm hnuah, Assembly House-ah thu a sawi dawn a, chumi hnuah Nagaland pan turin Mizoram a chhuahsan ang.