Photo Expo cum Sale buatsaih

Mizoram School of Photography (MSP) chuan nimin khan Millennium Centre kawtah Photo Expo cum Sale vawi hnihna an buatsaih ṭan a, MLA Vanlalzawma'n a hawng.

Vanlalzawma chuan, “Mizote hian thlalak kan uar deuh deuh a, thil thleng tawhte chu a thuin a ziah theih a, mahse, thlalak chuan hun kal daih tawha mi pawh hmuh theihin a chhawp reng thei a ni," a ti a; MSP-in thlalak ṭha leh mawi pho chhuahna hun an buatsaih chu lawmawm a tih thu a sawi.

Thlalak hmangin mipui hnena thil entir tur leh zirtir turte awl­sam takin mipuite a kawhhmuh thei tih sawiin Vanlalzawma chuan, a ṭha lo lam zawnga hman theih a nih avangin a ṭha zawnga hmang ṭheuh turin thla la ṭhinte a chah a, "Mi harsa leh dinhmun hniam zawkte ṭanpuina kawngah pawh thua sawi duaha fiah zo lo pawh thlalak hmangin awlsam têin a fiah thei a, chu chuan ṭanpui ngaite ṭanpui duhna kawngah mite a fuih thar thei a ni,” a ti.

Photo Expo cum Sale-ah hian thlalak ṭhahnem tak pho chhuah a ni a, a duh tan lei nghal theih a ni. Vawiinah leh December 2, 2017-ahte chhunzawm a ni ang.