DC-in Myanmar raltlante a tlawh

Lawngtlai DC Dr Arun T chuan November 28, Thawhlehni khan sorkar official dangte nen Lawngtlai district chhim tâwp lama Myanmar aṭanga Zo hnahthlak raltlan lo lutte an tlawh a; an mamawh hrang hrangte zir chiangin, hmalak dan tur an sawiho nghal. Raltlan mi 1,157 an awm meka chhinchhiah a ni.

Bawrhsap leh sorkar official-te hian raltlante awmna khua - Zochachhuah, Hmawngbuchhuah, Dumzautlang leh Laitlangte an tlawh a; heng khuaahte hian raltlante ko khawmin, hriat tur pawimawh hrang hrang an hrilhfiah. Raltlante chu an hriselna ngai pawimawh tur te, zun leh êk thlahdah lo tur te, kut silfai uluk tur te, chlorine nena sâwngbâwl sa tui thianghlim chauh hmang turte leh thosilên zár ṭha turtein an chah a ni.

Raltlante khawsakna tur hmun, inthiarna tur hmun, an mutbu leh ei leh in leh mamawh tur hrang hrangte chu khawtlang hruaitute nen sawihoin, hmalak dan tur an rél a; ramria awm Assam Rifles hotute nen pawh inkâwmin, Mizoram police-te nen venhim hna thawhna kawnga hmalak zel dan turte an sawiho a ni.

Raltlante hi kar hmasa lama Myanmar leh Mizoram ramri vela Myanmar hel pawl (Arakan army) leh Myanmar sipaite an inkah vanga mahni khuaa awm ngam loa Mizoram chhunga lo tlanchhia an ni a; hel pawl leh Myanmar sipaite an la inkah deuh reng avangin an la haw ngam rih lo a ni.

Raltlante hi Myanmar-a khaw pali - Varang, Pakauah, Phaleuah leh Satanguah khuaa mite an ni a; Lawngtlai district-a khaw paliah awmin, VLA leh VC-te chhinchhiah danin hmeichhia 635 leh mipa 522, an vaiin mi 1,157 an tling tawh.

Khaw palia raltlan awm zat chu - Zochachhuahah mi 250 (mipa –110 leh hmeichhia 140), Hmawngbuchhuahah mi 224 (mipa 100 leh hmeichhia 124), Dumzautlangah mi 240 (mipa 105 leh hmeichhia 135) leh, Laitlangah mi 443 (mipa 207 leh hmeichhia 236) a ni.

Lawngtlai district thuneitute chuan raltlante chhawmdawl hna an kalpui mek a, DC office aṭanga registration ti turin BLO leh VLA-te’n chhinchhiah hna an kalpui ang. Raltlante hi registration number hran ṭheuh pek vek an ni dawn a, chu chuan ration pek dan turah leh raltlante thawn kîr leh hun thlengin ṭangkaina a nei tura ngaih a ni.

Mizoram police leh Assam Rifles lamin a tìr aṭangin venhim hna an thawk reng a, Health department lamin November 28 khan Zochachhuah leh Dumzau­tlangah health clinic an buatsaih a, mi 29-te thisen an endikah malaria pf vei mi 11 an hmu chhuak a ni.