Germany sorkarin sik leh sá tidanglam tura An duan chhuah CM Hawla'n a tlangzarh

Germany sorkar hmalaknaa ruahman, sik leh sá inthlak dang­lam nasa lutuk tihziaawmna tur, 'International Climate Initiative (IKI) - Biodiversity and Ecosystem Services in Agrarian Landscapes' chu Advanced Research Centre for Bamboo and Rattan (ARCBR), Bethlehem Vengthlangah November 28, Thawhlehni tlai khan chief minister Lal Thanhawla'n a tlangzarh.

Chief Minister chuan, International Climate Initiative (IKI) hmalakna Mizorama kalpui a ni tur chu lawmawm a tih thu a sawi a, "GIZ leh DoNER mithiamte nen thawhhona ṭha tak neih theih a nih ka beisei. Thawhhona aṭang hian Mizoramin agriculture lamah hma a sawn phah ngei ka ring," a ti.

Sik leh sá inthlak nasain nunphung a khawih danglam tih sawiin CM Hawla chuan, "Mizoramah pawh kuminah lo neia eizawngte'n ruahtui tlak hma avangin harsatna an tâwk a ni," a ti a; buh leh bâl dehchhuah kawngah tunlai thiamna hman satliah mai ni loin, hmasawnna tluantling, ramngaw leh ramsa tichereu lo zawnga hmalakna ngaih pawimawh a ṭul thu a sawi.

Biodiversity and Ecosystem Services in Agrarian Landscapes tlangzarhna inkhawm hi PCCF Lalram Thanga'n a kaihruai a; IKI project director Dr Joerg Lohmann chuan an hmalaknate a sawifiah.

Biodiversity and Ecosystem Services in Agrarian Landscapes hi Germany sorkarin khawvel sik leh sa danglam nasa lutuk tiziaawm tura Deutsche Gesellschaft für Internationale Zusammenarbeit (GIZ) kaltlanga a hmalakna a ni a, ram pathum - India, Kenya leh Tajikistan-ahte kalpui a ni.

India hmarchhak bikah chuan GIZ hian Ministry of DoNER nen thawk dunin, hmalakna hmun atan state pathum - Meghalaya, Mizoram leh Nagaland te chu thlan a ni.