ZPM-in khaw pakuaah beihpui an thlak Made in Mizoram sorkar kan ni ang - Duhoma

Ṭangrual pawl, Zoram Peoples' Movement (ZPM ) chuan nimin khan Aizawl leh Lunglei inkarah beihpui an thlak a, khaw pakuaah vantlang inkhawm an buatsaih. Thu sawitu Lalduhoma, ZNP president chuan, kum 2018-a ZPM siam tur sorkar chu 'Made in Mizoram sorkar' a nih tur thu a sawi.

Aizawl leh Lunglei inkara khaw pakuaah hian ZPM-a tel pawl hruaitute'n thu an sawi a; khaw hrang hranga thu sawitu ZNP president Lalduhoma chuan, "Ṭangrual pawlin sorkar a siam hunah chuan sorkar building-ah leh sorkar luah in zawng zawngah tualchhung siam furniture leh Zo nu tah puan chauh hman a ni ang. Zirlaite'n tualchhung siam uniform-ah an ha ang a, ram chhung thar buhte ration-ah sem a ni ang," a ti a; kum 2018-a ṭangrual pawl siam tur sorkar chu 'Made in Mizoram sorkar' a nih tur thu a sawi a ni.

MPC party senior vice president Vanlalhlana pawhin thu sawiin, "Mizoram mipuite hian sorkar hmél thar, kalphung thar sorkar pian hun an nghakhlel tawh hle a, khaw hrang hrangah ZPM district/block/local committee a ding mawlh mawlh a, mipuite nghahhlelhna leh chona hi a nasa hle a ni," a ti.

Thu sawitu dang PL Liandinga chuan, "Kum 30 chhunga thuneihna inchan chhâwkte'n Mizoram hi state hnufual ber, hnam hrisel lo ber, zirna kawnga thuanawp bera min chhuah a ni," a ti a; chu vang chuan politics ngaihtuah ve ngai reng reng lo tan pawh ngawi renga thlirtu nih leh mawhphur ve loa inngaih mai chu thil theih a ni ta lo tih a sawi.

ZPM general secretary K Sapdanga pawhin thu sawiin, "Ṭangrual pawl sorkar hunah chuan hawrawppuia ziah leh pencil-a ziah a awm hrang lo ang a, Mizo tawh phawt chuan inang vekin sorkar zar an zo ang," a ti.

ZPM hian vawiin hian Lungleiah ZPM pisa an hawng dawn a, hawnna inkhawma tel turin Aizawl aṭangin ZPM hruaitute chu an chairman Lalliansawta hoin an kal a ni. ZPM hian naktuk Zirtawpni hian Hnahthial tlangdungah beihpui thlak chhunzawm an tum bawk.