Aithur khua hnenah ASEP Nopui an hlan

Association for Environmental Preservation (ASEP) chuan nimin khan Aizawl Press Club-ah General Assembly vawi 13-na, 'Nungcha Hmangaihtute Inkhawmpui' tia an vuah chu an hmang a; Lunglei district-a Aithur khua hnenah ASEP Nopui an hlan.

ASEP General Assembly kaihruaitu, an president K Lalmuansanga chuan, ASEP hmalakna avangin mi pasarihin thang 1,000 chuang leh sairawkherh 3,000 chuang ASEP kutah an hlan (surrender) tawh niin a sawi a; kum 13 chhungin Mizorama khaw hrang hrang 141-ah awareness campaign an neih tawh thu a sawi bawk.

ASEP hian an Assembly apianga an hlan ṭhin, ASEP Nopui chu nungcha humhalh kawnga theihtawpa hma latu Aithur khua hnenah an hlan a; ASEP hmalakna ṭawiawmtu thla latu mi 13 hnenah chawimawina an hlan bawk a ni.

ASEP hian agenda 23 an ngaihtuah a; an thu pass zingah - environmental photography tihhmasawnna kawngah sorkarin budget siam se an duh thu te, dan anga silai khuahkhirh a nih theih nan thuneitute ngen te, dragon fruit leh oil palm-te chu Mizoram tan a ṭhatna leh ṭhat lohna zir chian te, Serlui-B tuikhuah leh a chhehvel enkawl danah sorkarin uluk zawkin kalpui se an duh thute a tel.