Thenzawl-ah SAI phûl lem phah remti lo

Thenzawl Joint YMA leh Thenzawl Zone Football Association-te chuan, Thenzawl Public Playground chu Sports Authority of India (SAI) hnenah football academy hmun atan pek leh phûl lem phah an remtih loh thu an puang.

Thenzawl Joint YMA leh Thenzawl Zone FA hruaitute chu November 28, Thawhlehni zan khan Joint Meeting an nei a; Loṭhazawla Thenzawl Public Ground chu infiammi, mipui vantlang leh sorkar thiltih puina hmun ber a nih avangin SAI hnena kum tam tak chhung atana football academy hmun atana pek leh phûl lem phah an remtih loh thu an rêl a ni.

Loṭhazawl khelmuala phûl lem phah bul ṭanna atana ground levelling tura enfiah mektu SAI hnuaia MONIPCO Ltd. hnathawkte chu an hnathawh lai chawlhsan tura hriattirna leh ngenna lehkha an pe nghal bawk.

Thenzawl Joint YMA leh Thenzawl Zone FA chuan thuchhuah inṭâwm siamin, "Thenzawl khaw laili taka awm Loṭhazawl hi kum tam tak chhung SAI kuta neitu nihna hlan a, SAI Football Academy atana pek a, SAI football zirlai naupangte tan chauha football zirna tur phûl lem phah tum a ni hi nakin zela Thenzawl mipui leh infiammite hmakhua thlirin kan remti lo a, tuna hna thawh bul ṭan mek pawh titawp nghal turin kan hriattirin kan ngen a ni," an ti.