Hâlpuah leh hâlmawi khapna thupek Khauh taka kenkawh a ni dawn - Aizawl SP

Aizawl SP C Lalruaia chuan, Mizoram sorkarin hâlpuah, hâlmawi, silai lem (a mû kâp chhuak thei) leh meithallàwn (sky lantern) khapna thupek a tihchhuah chu Krismas leh kumthar vuakvêtah khauh taka kenkawh a nih dawn thu a sawi a, ti lui lo turin mipui a ngen.

Aizawl SP hian nimin khan a pisaah thuthar thehdarhtute a kâwm a; October 18, 2022-a Home minister Lalchamliana hoa sorkar thuneitute ṭhukhawmin hunpui thleng turah hâlpuah leh a kaihhnawihte khap turin thutlukna an siam thu a sawi a, "Aizawl district-ah chuan October 20 khan khapna thupek DC-in a chhuah. Thupek hi khauh takin kan kengkawh dawn," a ti.

Khapna thupek chuan Diwali hman zawh tâk pawh a huam thu sawiin C Lalruaia chuan, "Theihtawpin hma kan la. Security force hrang hrangte an awmnaah an hotute kan bia a, khapna thupek chungchang kan hrilh. Puak zeuh awm mah se, kan ûm zui nghal zel a ni," a ti a; Diwali laiin hâlpuah leh hâlmawi hàl a awm lo viaua an hriat thu a sawi.

Aizawl SP chuan, "Online hmanga thil chah thlenna hmunte chu sorkar khap thilte chah an awm chuan deliver lo a, police hnena hriattir turin kan hrilh. Bungraw phur veivâk ṭhinte pawh Mizorama phur lut lo turin kan ti," a ti a; kuminah ṭum khat chiah hâlpuah, hâlmawi leh a dangte an la man thu sawiin, "Kan mante hi hi Rs 68,000 hû a ni," a ti.

C Lalruaia chuan, man tur awm lo se tih chu an duhthusam a nih thu sawiin, "Khapna thupek hi mipuiin zâwm ṭha se kan ti hle. Thubuai neih hi thil buaithlak tak a ni," a ti a; hâlmawi leh hâlpuah tel loa hlim taka hunpui hman tum turin mipui a sáwm.

Mipuiin inhêk an hreh lutuk chu ṭha lo an tih thu sawiin SP chuan, "Nikum pawh khan khapna thupek chhuah a nih laiin kumhlui thlah zanah chuan an hâl nual tho. In chung sang tak takah gate kalhte'n an hâl a, a hâltu ber hriat a har hle," a ti a; halpuah leh a kaihhnawih thil hâl hriate chu police hnenah hriattir zel turin a ngen.

Aizawl SP sawi danin, nikum chhung khan hâlpuah leh hâlmawia khapna thupek zâwm lo mi 26 man an ni a, thubuai 23 ziah luh a ni. Mi an mante chu sorkar khap thil kawltu mi 19 leh hâltu mi pasarih an ni. Thubuai 23 ziah luh zinga 18-ah Court-in thutlukna a siam tawh a, thiam loh a chantir vek a; thubuai panga erawh chu chinfel a la ni lo.

Krismas leh kumthar vuakvêta sorkarin a khap - hâlpuah, hâlmawi, silai lem, meithallâwn kawl, zawrh, hralh leh hman khapna thupek bawhchhia hriate chu police station-ah telephone hmanga hriattir tura ngen an ni.