Mizoram Science Congress hman a ni

Nimin khan Legislative Assembly Annexe conference hall-ah Mizoram Science Congress 2022 hman a ni a, minister of state Lalruatkima'n a hmanpui.

Congress pualin Aijal Club Park-ah Science Exhibition buatsaih a ni a, Human Resources Development Board vice chairman L Thangmawia'n a hmanpui.

Minister Lalruatkima chuan, science lama thiamna leh hmasawn­nain khawvel boruak a tih danglam thu sawiin, "Sik leh sá a inthlak nasat dante, mihring duh dan, ngaih-tuahna leh beiseina thlengin a tidanglam mek. Thil inthlak zelin harsatna tam tak a rawn thlen hi science thiamna hmang thoin sutkian kan tum tur a ni," a ti a, ngaihtuahna séng turin science lama mithiamte a chah.

Science Congress hawnnaah hian PHE Project Management Unit director H Duh­kima'n thupui 'Science & technology for sustainable ecosystem' tih a sawi.

Mizoram Science Congress hi Mizoramah kum 2016-ah hman ṭan niin, kum hnih danah buatsaih ṭhin a ni a; kumina Congress puala exhibition buatsaihah science lam kaihhnawih department ṭhenkhat leh mimal bakah, zirlaite'n an thil siamte an pho lang. Exhibition bika thupui chu 'Science and technology for management of water resources' tih a ni.

Science Congress-ah hian Mizoram chhung leh páwna science lama kawng hrang hranga scientist leh mithiam 130 chuangin ṭawngka leh poster hmangin presen­tation an ti dawn a ni.

Mizoram Science Congress pualin October 21, 2022 khan Mizoram Children Science Congress buatsaih a ni tawh bawk.