Vairengtea kuhva chhêkna kudamah Poppy leh Myanmar teak man a ni

November 23, Nilaini zan khan Vairengte dáia kuhva chhêkna kudam pakhatah ruihhlo chi khat, opium siamna hmanrua nia hriat poppy seed ip 100 leh Myanmar aṭanga lak luh teak cubic 200 man a ni.

Kolasib district forest officer (DFO) Margaret Lalramchhani leh a hote chuan an thu dawn bawhzuiin, Nilaini zan khan Vairengte daia Lal­thlamuani kuhva kudam kawtah dan loa lak luh Burma teak cubic 200 an man a, kudam an enchiannaah poppy seed ip 100 an hmu tel bawk.

Vairengte police-te chuan poppy seed leh teak thing neitu nia inchhal, Lalbiaktluanga, New Champhai nia insawi an man nghal.

Kolasib DFO-in first information report (FIR) a thehluh bawhzuiin Vairengte police-te chuan teak thing phurhna lirthei khalhtu leh handyman-te pawh thu zawhfiah atan police station-ah an hruai a ni.

Lalbiaktluanga sawi danin, teak thing leh poppy seed-te chu Myanmar aṭangin a lei a, Mélbûk aṭangin truck MZ-01 J-7886 hmangin Vairengte a thlenpui a, kawng lakah an paltlang checkgate ṭhenkhatah pawisa a pe a ni.

Vairengte dáia kudamah pawisa chawiin a dah a, hnam dang hnena hralh tur a nih rualin, a leitu tur biak lâwk a nei lo.

Vairengte police aṭanga Vanglaini thu dawn danin, poppy seed-te hi NDPS Act hnuaia thubuai ziah luh theihna mumal a awm lo a, chuvang chuan poppy seed leh a neitu nia inchhál chu Customs hnenah hlan a ni ang.

Kudamah hian kuhva rah pawh ṭhahnem tak hmuh a ni bawk a; báwm hranah dah luh ṭhat leh mek a ni a, he thu ziah lai thleng chuan man a ni lo.