Assam Rifles hotute chuan, Zokhawsanga an hmunpui thar chu Union Home minister Amit Shah-a'n a hawng dawn tih sawi awm chungchangah, Ministry of Home Affairs (MHA) hotute aṭangin thu dawn an la neih loh thu an sawi.
Vanglaini palai zawhna chhángin Assam Rifles hotute chuan, November 22, 2022 thleng chuan MHA aṭangin thu dawn an la neih loh thu an sawi a, "Union Home Minister leh Chief Minister an inbia pawh a ni mai thei. Hawn a nih dawn hunah chuan min rawn hriattir ve kan ring a, hriattirna kan la dawng lo. Tun thlaah chuan hawn hman a nih kan ring lo," an ti.
Assam Rifles hotute chuan, "MHA lamin insawn tura min tih hun hun kan insawn hun tur a ni mai. MHA lam aṭangin thu dawn kan la nei lo," an ti a; Zokhawsanga insawn chu an hreh loh thu an sawi.
Zokhawsanga AR hmun hawn chung­changah hian CM Zo­ramthanga chuan Sep­tember 25, 2022-a thuthar thehdarhtute a kawm ṭumin, Home minister Amit Shah a kawmnaah, AR headquarters thar chu Prime Minister emaw, Home Minister emaw ngeiin a hmunah hawng se a duh thu a hrilh tih a sawi a, "Home Minister hian a châk thu sawiin, 'Ka phûr khawp mai' a ti a, a hun atan November kan ruat a, a ní tak erawh kan la tifel lo," tiin a lo sawi tawh a ni.
Vanglaini palai zawhna chhangin CM Zoramthanga chuan, AR-te chu Zokhawsangah eng emaw zat an awm tawh thu a sawi a, "La lut kim lo erawh an awm. Union Home Minister berin a hawn tawh chuan lut nghal tura ngaih an ni. Home Minister-in a hawn tawh chuan an luah zui nghal kha chu loh theih loh turah kan ngai," a ti a; chutih rualin, thâwk leh khata luh nghal vut vut theih a nih loh tur thu a sawi tel bawk.