Mizoramah a ṭum khatna atan Lie detector hman a ni dawn

Mizoram police-te chuan an thubuai chhuina pui turin a ṭum khatna atan December 2022 tìr lam hian lie detector an hmang dawn.

Miin dâwt a sawi leh sawi loh hriat theihna nia sawi, lie detector hmang hian September 2022-a Aizawla naute pakhat, mipat hmeichhiatna thila khuaikhem ni ngeia hriat nu leh pate thu zawhfiah tum a ni.

Thuthar thehdarhtute zawhna chhángin Aizawl SP C Lalruaia chuan, lie detector hmang tur hian Court aṭangin phalna an neih tawh thu a sawi a, "Delhi-a Forensic Science Laboratory aṭangin mithiam pathum chu an khawl nen an rawn kal dawn. December thla tìra rawn kal turin an ticket tur pawh lâk vek tawh a ni," a ti.

Vanglaini thu dawn danin, naute pawngsual ni ngeia hriat nu leh pate chu police-in manin, ṭum eng emaw zat thu an zawt tawh a, mahse, tun thlengin finfiahna an la nei thei lo. Naute nu leh pate hi tunah chuan bail-in an chhuak mek.

Lie detector hman hi a tirah chuan naupang nu leh pate'n an duh loh avangin police-te chu Court-in phalna a pe thei lo a, a hnuah an duh leh avangin an hmang thei dawn ta a ni.