Ad hoc aided school-te'n sorkar sikula dah thuai turin Mizoram sorkar an phût

Mizoram Govt. Ad hoc Aided High School Teachers’ Association (MIGAHTA) chuan nimin khan Aizawla Chanmari YMA Hall-ah consultation meeting an nei a; sorkar sikul (provincialise) ni tura sorkar an ngenna kal mek chungchang sawihoin, provincialised dinhmuna dah thuai turin Mizoram sorkar an ngen.

Inràwnkhawmnaah hian resolution an siam a, "Mipui mamawhna avanga vantlangin an din sikul, kum 30 vel zeta upate April 1, 2008-a ad hoc status-a hlàn kai tawhte hi kan sorkar hian a hma thei ang berin provincialised status-ah hláng kai rawh se," an ti a; hmalak dan tur an duang nghal.

MIGAHTA tarlan danin, ad hoc aided school-te hi mipui mamawhna avanga khawtlangin an din a ni a, kum eng emaw zat sorkar aṭanga ṭanpuina dawng lo leh zirtirtute pawh hlawh nei mumal loa thawk ṭhinte an ni. MNF sorkar hmasain kum nga dan zelah dinhmun sang zawkah a hláng kai ṭhin a; kum 2003-ah lumpsum aided leh kum 2008-ah ad hoc aided-ah a dah tawh a ni.

Ad hoc aided school-a thawkte chu private school an nih lai aṭanga kum 30 dawn thawk tawhte an ni hlawm tih sawiin MIGAHTA chuan, "Tunah hian mái pár thlawna pension chhuak leh boral an tam tawh. Chuvangin, vawiina consultation meeting chuan pangchang tak chungin min hringtu MNF sorkar ngei hi provincialise status-a hláng kai thuai turin kan ngen nawn leh a ni," an ti.

Kum 2018 MLA inthlanpui neih dawn khan aided school zawng zawngte dinhmun sang zawka dah vek turin MNF party hotu, tuna sorkar hotute hian hmun hrang hranga khawtlang mipui hmaah an lo sawi tawh tih an tarlang a; chu'ng an sawi tawhte chu a taka chantir ni tawh se an duh tak zet thu an sawi bawk.