Synod Bookroom hmunpui in thar hawng

Synod Bookroom headquarters building thar, Rs 8,16,39,000 sénga sak chu nimin khan Synod moderator Rev. Dr Vanlalnghaka Ralte-in Pathian hnenah hlànin a hawng.

Mission Venga Synod Bookroom hmunpui hawnna inkhawm hi Synod PRESCOM changtu Synod executive secretary Rev. VL Luaia Hrànleh-in a kaihruai a, PRESCOM general manager Upa H Ronghaka'n in thar sak chanchin a sawi. Synod Office leh a hnuaia péng hrang hranga thawkte leh Synod Executive Committee member-te an tel a ni.

Synod Bookroom sa ṭha turin in hlui zawk chu November 23, 2017-ah ṭhiah ṭan a ni a, July 17, 2018-ah sak ṭan niin, in satu contractor chu CT Mawia Construction, Kolasib a ni. In hi chhawng ruk niin, square feet 27,680-a zau a ni a, a dung sei lai berah ft. 123 niin, a vâng lam kiar lai berah ft. 77 a ni.

Lehkhabu leh thil chi hrang hrang zawrhna leh hralh chhuahna bik chu sq.ft. 3,700-a zau a ni a, in chhawng hnih chu bungraw dah khawmna (stockroom) atan hman a ni. PRESCOM/Bookroom hotute chênna tur quarters pathum dah a ni bawk.