CM-in khawl leh tuizém a sem

Chief minister Zoramthanga chuan nimin zing khan a bial, Aizawl East-I chhunga Sihphir Venghlun, Sihphir leh Nausela Covid-19 léng vanga eizawnnaa harsatna tâwk leh hmeithaite hnenah puanṭhui kháwl leh tui litre 1,000 dawng tuizém a sem. Thil semte hi MLA fund aṭanga lei a ni.

CM Zoramthanga chuan, hripui léng vangin hun rei tak nunphung pangngai a awm thei lo a, eizawnna pawh kalpui thei mang lo mi tam tak an awm avangin economy-in a tuar tih a sawi a, "India ramah pawh chhiah tling khawm a tlem phah a, state tinte'n chhiah tling khawm aṭanga an chanpual an hmuh ngei tur pawh an hmuh theih loh bakah, sorkar laipui aṭanga hmuh tur dang tam tak hmuh a ni lo," a ti.

Beisei lâwk loh harsatna hrang hrang avangin state hmasawnna a ṭhuanawp thu sawiin Zoramthanga chuan, "Hun harsa karah pawh a remchang awm apiangah theih ang anga hmalak a ni a, boruakin ziaawm lam a pan hnuah phei chuan beiseina nen theihtawp chhuahin hmalak a ni," a ti bawk.

Chief Minister hian khua/veng pathuma hmalakna hnathawh ṭhenkhat leh hmalakna tura khawtlang hruaitute'n an lo thlente a enpui nghal a, khawtlang hruaitute nen an inkâwm bawk a ni.