MPYCC-in Luangmual PACS an tlawh

Mizoram Pradesh Youth Congress Committee (MPYCC) hruaitute chuan nimin khan Luangmual Primary Agriculture Cooperative Society (PACS) an tlawh a, an dinhmunte zir chiangin, PACS member-te nen an inkâwm.

MPYCC president Dr Lalmalsawma Nghaka chuan, PACS chu Congress party manifesto no. 1, ṭang puihna nena thawk dun tur leh hmalatu pawimawh tak a ni dawn tih a sawi a, "Congress party-in sorkarna kan chang a nih chuan, PACS kaltlang hian Mizote ziaa bet tlat rinawmna, taimâkna leh inchawikânna kalkawng kan zawh tláng dawn a ni," a ti.

Dr Lalmalsawma chuan, PACS chu bazar nu ho te, khârchhâwngtu te, kut hnathawkte leh ni tin eichawp zawngte tan ban phâka an awm zel a pawimawh dawn tih sawiin, "Mi dangte tana malsawmna thlentu leh an dinhmun sawh nghehsaktu in nih zel ka beisei," a ti a; PACS chu pawimawh an tih avangin PACS hrang hrangte hmalakna an hmun ngeiah kal chilhin an zir chiang tih a sawi.

Luangmual PACS hi February 2, 2019-ah din a ni a, loan Rs 33,093,713 pe chhuak tawhin, deposit Rs 12,01,49,851 an nei mek. Anmahni dawrtu tam ber chu ar, bâwng leh vawk vulhtu te, huan siam te, chawhmeh zuarte leh khârchhâwngte an ni.