MLA-ten eirukna do turin hma an hruai dawn - Lalduhoma

ZPM Hachhek North Block chuan nimin khan Kawrthah Hmarveng YMA Hall-ah conference an hmang a, an hun hmanpuitu ZPM leader Lalduhoma chuan sorkarna an siam chuan eirukna do turin MLA-ten hma an hruai tur thu a sawi.

Lalduhoma chuan thlemna tè deuh pawh an hneh chuan thlemna lian lakah an inveng nghal tihna a nih thu sawiin, "Thlem ngam loha awm turin kan inbuatsaih a ni. ZPM-a sorkar chuan eirukna do turin mipui aiawh thlantlin MLA ten hma an hruai dawn a, kan inpeih hle tawh a ni," a ti.

A kalphung avangin sorkar a dik dawn tih sawiin ZPM Leader chuan, "Dik loa awm a harsa hle dawn a ni. Eiru ṭhinte'n sim an harsat hle a, mipuiin kan ring thei tawh lo," a ti a, kalphung thar chu politics tuinu la dai ngai lo, la eiru ngai lo, rilru thianghlim tak tak ten an thawk tur a nih thu a sawi.

Thusawitu dang ZPM working president K Sapdanga chuan, "Hachhek tlangdungah kuhva rah la inkhai kan hmu a, a mi deh a dang ngei mai. Kan eizawnna bulpui berah harsatna kan tawk a, a tuar nasa ber tlangdung kan ni. Kan hlimna leh thlamuanna min petu khan kan lung a tichhia a, kan mittui a tla a ni," a ti.

K Sapdanga chuan hmasawnna hnathawh chhui lai mek eng emaw zat an neih thu sawiin, "Ṭhenkhat chu sum puk chawp a ni chungin dik lo baksaka hna thawh a ni a, a rapthlak khawp mai. Thalaite an mangang tak zet tawh," a ti a, ṭhalaiten kalphung thar an nghakhlel tawh tih a sawi.

ZPM thuchhuah tarlan danin, he hunah hian Hachhek North Block ZPM huam chhung aṭangin ZPM party-ah mithar 502 lawmluh an ni.